４月底去咗濟州影pre-wedding，好多朋友問有冇review，喺道分享一下：
   
其實plan pre-wedding時一早已經心儀韓國這個地方，因爲見過其他朋友喺不同地方影的pre-wedding，比較之下都係韓國的化妝和拍攝風格較符合我們的喜好，後來喺IG找到One Plus One Wedding，再喺婚展睇埋相，覺得成個package幾好，就揀咗呢間。
   
拍攝前會比揀你想去咩場景影相，有啲想影的scene唔係四季都有，我本身對花冇咩認識，cap咗人地影嘅相，話想影白色／黃色花，攝影師竟然真係安排到，最後影到超靚的花海～
   
拍攝當日翻譯員喺酒店大堂接我地，跟住就車我地去揀婚紗禮服，試衫過程好順利，我先表達自己中意咩style，之後婚紗店員每次拎兩件出嚟比我二揀一，再根據我嘅選擇adjust之後比咩款我睇，所以係越試越啱，對選擇困難的我非常友好。之後化妝set頭都一樣係了解咗我喜好之後先落手化，韓妝多數係自然style，平時唔化妝的我唔識comment，但未婚夫同屋企人朋友都話眼妝好sharp好靚。之後全程都有個女助手跟住，換裙、補妝、換髮型、買午餐、拎嘢，佢個人唔多講嘢但好helpful。
   
攝影師方面，大推studio 17！呢個studio由一對攝影師夫婦負責，兩位都好專業同有禮貌，指示清晰、有耐性，特別係女攝影師好可愛，一路有guide住我地擺咩pose同做咩表情都好encouraging，令到我地好放鬆，影出嚟啲相都睇到我地表情係自然嘅。一男一女兩位攝影師攞嘅角度有啲唔同，所以同一個scene會有多啲相可以揀，大讚！
   
Overall嚟講，我地都幾滿意呢個pre-wedding體驗，價錢係唔算平，但我地total影咗４個場景，換咗３套婚紗／２套西裝，中間換２次髮型，又有咁多staff幫手，我地只需要準時，其餘咩都唔駛理……喺香港應該做唔到，我地就覺得幾值得。